Monday 16 April 2012

ಪರದಾ!


ಪರದೆಯ ಹಿಂದಿನ ಷೋಡಷ ಪ್ರೌಢಿಮೆ
ದೇವರು ಕೂಲಂಕುಷವಾಗಿ ಕೆತ್ತಿದ ಶಿಲ್ಪ
’ಈದ್ ಕಾ ಚಾಂದ್’ ತರಹ ಆಗಾಗ ಕಾಣುವ ಕಣ್ಣು
ಚುಂಬಕಶಕ್ತಿಯದಕ್ಕೆ ಬರೇ ಹಡೆಯುವ ಯಂತ್ರವಲ್ಲ

ಹೂ ಬನದ ನಡುವೆ ಹಾರಾಡುವ ಹಸಿರು ಚಿಟ್ಟೆ ರೂಪುಗೊಂಡಿದ್ದೆ ಕಂಬಳಿಹುಳದಿಂದ
ನೀಲಾಂಜನ ಪ್ರಕಾಶಿಸುವುದೇ ಹೊತ್ತಿದ ಬೆಂಕಿಕಡ್ಡಿಯಿಂದ
ನೂರೆಂಟು ದಿಕ್ಕುಗಳಲ್ಲಿ ತನ್ನ ಪ್ರಸ್ತುತಿಪಡಿಸುವಾಸೆ
ತಾನೊಬ್ಬ ಪ್ರಬುದ್ಧೆ ಎದೆಯತ್ತಿ ನಿಲ್ಲಬಲ್ಲೆ ಸಮಕಾಲೀನರ ನಡುವೆ

ಧರ್ಮ ಅಧರ್ಮಗಳ ಕಣ್ಣುಕಟ್ಟು ಗಾಂಧಾರಿಯಗಿದೆ ಈ ಜಗ
ಓ ಅಲ್ಲಾಹ್! ಬೇಗ ನನ್ನೀ ಬಂಧನದಿಂದ ಮುಕ್ತಿಪಡಿಸು ಎನ್ನುತಿದೆ ಮನ
ಮೈತುಂಬ ಸುತ್ತಿರುವ ಸಂಕೋಲೆಗಳನ್ನು ಕಿತ್ತೆಸೆದು
ಪ್ರಪಂಚವಿಡೀ ಸ್ವತಂತ್ರಹಕ್ಕಿಯಂತೆ ಹಾರಾಡುವಾಸೆ

                    -ಶಿಲ್ಪ ಶಾಸ್ತ್ರಿ

No comments:

Post a Comment